Jersu…. Chini no dhu connoscit! Sa bidha de Jersu
At èssiri po su binu - bonu de aberu - at èssiri po sa gana de trabalgiai de s'jersezu - chi scit eita bolit nai a si ndi pesai a coitu po mòviri a su sartu e a ndi torrai fadiau e mortu a domu sua - at èssiri puru poita su jersezu scit eita sensu tenit e depit tènniri su dinai - est po cussu ca no dhu spàciat in duas dis, mancai calencunu stràngiu cunfundat su ''rispàrmiu'' cun su ''pùinu cungiau'' - .Comenti chi si siat, Jersu est una bidha connota e stimada in dogna logu, non feti de s'Ogliastra, ma de sa Sardigna intrea. Jersu bitu de sa provinciali chi àrciat a Sant'Antoni

Bastat a dhu castiai po biri ca est unu paradisu po coment'est postu: a palas is montis de Coròngiu, Porcu de ludu, Troiscu, Gedili, Sant'Antoni: su fragu bellu e forti de su murdegu e de sa murta, su lioni e sa siliba, sa melorrù e sa tuvara. Dogna calidadi de matas e de froris…aria frisca e pulia, archeologia, domus de janas, su turismu, sa natura, su tempus e s'istòria passada… ....castiendu Coròngiu....
E a s'atra parti su mari, s'erriu de Pardu, Pelau cun is bingias e s'agina bona, sa passioni e s'amori po cust' ''arte soprafina'' chi est cussa de curai su fundu de sa sarmenta, de nd'arregòlliri su frutu e ndi bogai su binu, su Cannonau: unu nòmini acapiau a sa bidha nosta, comenti sa filongiana s'acapiat a su filu ferru in sa catena! A palas is montis....a denanti su mari....
Po mori de cussu, s'istadi jerseza est pensada totu in pissu de sa Sagra de su binu, su primu dominigu de Austu, e de ''Calici di Stelle'' infatu, su degi de su matessi: tempus bonu no feti po calai a mari, ma fìncias po andai a teatru in prassa de is ballus, ascurtai musica, intèndiri e imparai cosas interessantis meda, mancai tastendu un unconi de pessa orrostu, unu pratu de culurgionis o calencuna cocoi prena e cocoi de tamata, sèmpiri con sa tassa prena de Cannonau in manus… Unu fundu de sarmenta carriau de agina